譚炳文去世,享年86歲

近年病患纏身的譚炳文終在昨天病逝,他數十年的配音生逝、在《歡樂今宵》和諸多劇集的演出,還有膾炙人口的《
你回來吧》和《舊歡如夢》,都是香港人的集體回憶,願其家人早日平復。


(來源:香港電台)

譚炳文因肺癌逝世 享年86歲

無綫電視在社交平台表示,藝人譚炳文早上因肺癌逝世,享年86歲。

無綫表示,譚炳文去年曾經因為心臟衰竭入院,亦據悉3個月前患上肺癌,曾接受電療,但癌細胞已擴散,星期六凌晨因呼吸困難送院,延至早上11時離世。

無綫指出,譚炳文在50年代加入演藝行業,擔任播音員,後來拍攝電影,亦曾灌錄唱片成為歌手,經典歌曲《舊歡如夢》是由他原唱。

譚炳文近年主力配音工作,亦擔任司儀及主持,去年淡出幕前演出。

(來源:晴報)

女兒譚淑瑩含淚難捨老父嘆太突然 「佢仲有心願未了想工作」

資深演員譚炳文今早突然離世,大批傳媒到律敦治醫院守候,其女兒譚淑瑩下午1點40分由四位親友陪同離開醫院時接受簡單訪問,淑瑩甫開口就已經激動落淚,她直言:「太突然喇,冇心理準備。」她控制情緒後,慢慢道出爸爸的病況,她表示:「6月時以為佢係骨痛,帶去睇骨醫,跟住發現有癌症擴散,去瑪麗醫院接受電療之後,已經唔痛喇,不過活動能力弱咗,醫生話要時間慢慢修復。琴日同佢去葛量洪醫院覆診,醫生畀佢逢星期五覆診,冇事就可以返家休息。」

淑瑩表示半夜12點,爸爸感到呼吸困難,於是召喚救護車送院到律敦治醫院,她說:「我等到3點幾,本來醫生話可以返屋企,點知今朝7點突然話佢透唔到氣,要我哋即刻去醫院,太突然,未接受到。我哋本身諗住佢至少捱多一、兩年或者幾個月,佢有個心願,同樂小姐(樂易玲)簽咗約,佢好想完成啲工作,因為佢腦袋仲係好清晰,知道你講咩,只係活動慢咗,所以真係接受唔到,我真係好唔捨得佢。」由於事出突然,淑瑩稱未安排身後事,會找佛教法師為爸爸誦經。

好友薛家燕和胡楓跟譚炳文相識多年,對死訊大感驚訝,家燕姐說:「我聽到當然係好難過,佢真係睇住我哋大,識咗咁多年,《流行經典50年》請佢出嚟唱歌,佢已經好耐冇出嚟唱歌,佢好錫我、好畀面,同修哥(胡楓)一齊出嚟表演。唉...好難過好唔捨得佢離開,祝炳哥一路好走,屋企人都節哀順變。炳哥喺影藝界貢獻良多,尤其是喺配音方面,指導同培育咗好多新人,佢真係可以話係『配音王』。佢久唔久都會返去配音,視工作於娛樂,好敬業樂業,好值得後輩學習。」而胡楓形容跟譚炳文是超過60年的好朋友,難忘事多不勝數。

(來源:東網)

薛家燕哽咽嘆四次「難過」

「配音王」譚炳文今早因肺癌離世,終年86歲,不少圈中藝人得知消息感到哀傷。好友薛家燕哽咽連呼四次「難過」,語帶傷感嘅佢亦細訴二人每日都有通訊:「好難過,真係好難過,諗唔到咁突然囉…佢日日都Send Message畀我,又早安、又祝身體健康,好多鼓勵嘅message畀我。個幾月前,佢身體有啲唔舒服要入醫院檢查幾日,佢就話『對唔住啦!呢幾日就冇message畀你,出院先再搵你。』我仲叫佢唔使,叫佢休息吓,我哋Send Message畀佢就得喇……唉…係囉…諗唔到好突然咁…就走咗。因為有同佢囡囡瑩瑩通電話,尋日佢都仲好哋哋,今朝就突然走咗,好難過,真係好難過,睇住我哋大,識咗幾十年…」

薛家燕今日在她主持的新城電台節目中,甫開始時她聲調低沉地說:「今朝收到好多朋友和傳媒朋友電話,我今朝都收到瑩瑩短訊通知,話炳哥(譚炳文)已經離開咗,之後我打畀瑩瑩,聽到佢喊緊,真係好難過,幾十年,佢睇住我成長。」期間家燕姐更聲音震抖,兩度說:「真係唔捨得,真係唔捨得。」她讚炳哥在配音界貢獻良多,5月還續約返工,好敬業樂業,她說:「佢配音好高準確度,係後輩學習榜樣,佢初初係播音員,當時要講好多古仔故事,同埋佢把聲好靚,一聽佢把聲就諗起情情愛愛,男主角出現喇!同埋只要佢配音,就算個演員戲得唔好,因為炳哥配音,令演員啲戲畫龍點睛,呢個係佢專長,難度好高,要長年可能一日8小時喺黑暗中度過。」

資深歌手「黑妹」李麗霞亦回應:「我也剛知到炳哥離去。炳哥佢係娛樂圈一位奇才,歌、影、視、播,都樣樣皆能,而且對後輩鼓勵有嘉,佢對我嘅指導,我永不忘記,佢嘅離開對我哋嚟講係一個好大嘅損失!一路好走。」

而江美儀表示1月曾與譚炳文接受訪問,正是最後一次見面:「我幾個月前同佢做咗個訪問,點知係見佢最後一面。那次訪問非常愉快,佢好鍾意熱鬧,好喜歡工作,仲好精靈,佢個女好錫佢,照顧得佢好好。希望炳哥早登極樂世界,阿彌陀佛。」

曾與譚炳文合作劇集《果欄中的江湖大嫂》的陳煒,表示亞視入行時已認識對方:「佢係好好嘅長輩,畀新人好多意見,成日傾偈、好關心我哋。最後見佢係上年TVB藝人生日會,佢11月生日,就算行動不便都熱心、踴躍參加,仲玩得好投入,好有中氣,佢囡囡有陪伴住佢。」

車淑梅在社交網發文悼念:「炳哥一路好走……永遠懷念……幾個月前曾致電炳哥約訪問,他聲音柔弱,他說我哋兩日前已經錄咗啦……好吧,我們遲一些再約……想不到……還記得,好多好多年前,炳哥提議和我開一個播音訓練班,當時參加的朋友以為是騙案,怎想到譚炳文車淑梅合作開班!就是這件事,我們笑了很久……其實,炳哥的笑聲也是份外有魅力的!請炳哥府上各位好好保重!」

關菊英表示今早才得知消息:「疫情同炳哥好耐冇見,加上佢又唔舒服。之前知佢好番啲,5月新聞報道佢同TVB續約,以為幾好,只知一向腰骨痛,所以聽到好shock!」

與譚炳文認識六十載的胡楓,對好友離世深表難過,並謂:「同佢識咁多年,真係有好多難忘嘅事,佢係一個好幽默、冇機心嘅人,我哋最後一次見面,應該係幾個月之前,當時佢仲幾好,冇乜嘢,我時不時都有托佢個女問候,佢個女好孝順,(知唔知佢有肺癌?)唔知,淨係知佢有腰痛。」

著名導演杜琪峯跟譚炳文相識多年,兩人亦師亦友,對於他的離開,他表示:「好多年前我做電視副導時已經認識佢,佢係一個好好嘅演員,佢教咗我好多嘢,一直亦師亦友,到我做電影導演都有間中搵佢演出,佢好鍾意食,佢成日話畀我知道邊度啲嘢好食,又帶我去,所以間中都有聯絡同食飯,希望佢家人節哀,老人家一路好走。」

(來源:香港蘋果日報)

好友對死訊感震驚 胡楓:超過60年老朋友

「配音王」譚炳文今早因肺癌離世,享年86歲。據知炳哥在3個月前確診患上肺癌,但當時未有告知身邊的朋友,只是表示自己的腰很痛,所以炳哥的死訊傳出後,不少朋友感到愕然。

譚炳文的親表妹陳曼娜,得悉表哥離世感難過,她說:「我知佢有病,幾年前我個女結婚,佢都係因為身體麻麻,所以嚟唔到,但我就唔知佢咩病。」她與炳哥從未合作過,但自幼已覺得對方好有明星風範,她說:「好深刻細個去飲宴,當時自己得十幾歲,未入行,而表哥已經係當紅小生,後生又靚仔,見到佢就好似見偶像一樣。」她回憶往事,表示每次跟人講「表哥表妹」關係,都會被人笑是「揩油」,炳哥便會笑着說:「唔係哎吔表妹呀。」

與炳哥相交數十年的羅蘭姐,從記者口中得知炳哥的死訊後,愕然地說:「吓,炳哥走咗?我知佢話睇醫生,又一個老友。我哋有一段時間冇見,而家啲疫情咁,邊會有約人,我知佢有啲唔舒服,佢個女都日日陪住佢。」羅蘭姐哽咽地表示會致電炳哥的女兒了解。

此外,黃夏蕙和炳哥相識多年,情同兄妹,《蘋果》今日致電告知炳哥死訊,黃夏蕙驚愕地說:「咁點算,睇到呢個消息,我而家成個人震晒,我哋一直有聯絡,呢排疫情緊張先停見,我唔知佢有肺癌,我唔見佢有咳,佢又唔食煙。但知道炳哥腰部生骨刺,唔行得,上年佢生日前本來想話做手術,因為知道成功機會五五波,佢話生日後先做,推推吓就疫情。炳哥腰病壓住神經線,佢要成日睇醫生做針灸同按摩,我有陪佢去睇過,我哋好多時會等佢睇完一齊食晏,我呢排仲買咗月餅想搵人拎畀佢。」黃夏蕙表示炳哥一直關照她:「佢對我照顧簡直係uncle,佢教曉我好多嘢,如果炳哥聽到人哋講我一句唔好,佢會同我出頭,佢離開,我好唔捨得。」

胡楓(修哥)得悉炳哥死訊後,亦很傷感:「我哋超過60年老朋友,炳哥份人非常好,人冇機心,同佢嘅難忘事真係講唔晒,大家工作時傾傾講講好開心,唔單係同事仲係好朋友。我知炳哥近日身體差,佢又一向好弱吓,我就唔知佢患咗肺癌,我平日見佢要山長水遠返工,我有透過佢囡囡問候炳哥,叮囑佢要小心,我冇直接聯絡佢,怕騷擾到佢。」

汪明荃(阿姐)亦是今日接到記者電話才知炳哥離世消息,她說:「好難過,我哋好好朋友,呢排冇聯絡,我之前仲見佢上《流行經典50年》,佢囡囡仲成日陪佢出入。」

(來源:香港01)

從事配音逾半世紀 經典作品無數難忘《聖鬥士星矢》

有「配音王」之稱的譚炳文在三個月前發現患肺癌,直至今日(5日)不敵癌魔逝世,終年86歲,消息一出,令不少圈中好友及粉絲都悲痛不已,紛紛懷念這位老前輩。譚炳文曾參演不少戲劇作品,更從事配音工作逾半世紀,他的去世對於香港配音界來說絕對是很大的損失。

譚炳文早在1950年代開始配音工作,直至1964年他首次參演電影《改造小姐》後,獲製作人鄧仕樑賞識力捧,後來更與好拍檔李香琴合組「李氏影業」拍攝電影,及後則自組「譚氏影業」公司。1968年譚炳文正式加入TVB做藝員及配音員工作,他一直專注於粵語配音,直至1975年TVB開辦配音訓練班,譚炳文更與幾位資深配音員丁羽、梅欣、盧國雄等擔任導師。

雖然譚炳文曾短暫離巢轉投亞洲電視,但他在1999年回巢後就主力配音,更從事配音工作逾半世紀。譚炳文是日本演員泉穀茂、濱田晃、龍雷太、伊東四朗、韓國演員宋在浩、李德華、申久、台灣演員金超群、美國演員馬龍白蘭度的常任配音員,他配音的範疇廣泛,無論是動畫片、歐美劇、日劇還是韓劇都難不倒他,當中《藍精靈》中的精靈爺爺,《聖鬥士星矢》中的童虎、基加斯、城戶光政三人,《變形金剛2》中的阿爾法師尊等人物都是譚炳文的經典配音作品。

譚炳文在2014年無綫配音組仝人聯歡暨頒獎典禮中,獲頒發「終身成就獎」,之後再在同年年底於《萬千星輝頒獎典禮2014》榮獲「萬千光輝演藝人大獎」,肯定及嘉許他在演藝圈中的貢獻及付出。

(來源:YAHOO娛樂圈)

配音長青樹 經典聲演作品數一數 最入腦係叫人「唔好食煙」

資深藝人譚炳文(炳哥)今早因肺癌離世,享年86歲。炳哥除咗幕前演出之外,最為人熟悉嘅應該係把聲,因為佢多年來參與唔少配音工作,今年5月先同TVB配音組續約,近年仍然有唔少動畫同劇集由佢配音,經典之作多不勝數。

神探俏嬌娃

70年代電視台購入美劇,唔止喺英文台推出,亦會以配音版俾中文台播放。《神探俏嬌娃》(Charlie’s Angel)故事耳熟能詳,三位靚女主角為查案出生入死,背後大老闆Charlie只見其聲不見其人,演繹相當有難度。每集尾段Charlie都會打電話聯絡三位天使,一句「Hi, 三位靚女」令觀眾留下深刻印象。

包青天

90年代台劇《包青天》收視高企,香港兩間電視台先後購入,率先播放嘅亞視搵炳哥為主角包拯配音,將包公威武、仁慈及正直的角色特質呈現,深入民心。往後多套《包青天》或有包拯出場的劇集,都由炳哥幕後發聲,一下「鍘!」霸氣盡展。

IQ博士

炳哥配過嘅動畫多蘿蘿,入屋嘅應該係《IQ博士》嘅「宇宙大王」,以諧趣語氣扮演傻氣外星人。近年有便利店換領IQ博士產品,個廣告都係搵炳哥配返「宇宙大王」!

美國癌症協會-尤伯連納忠告

80後集體回憶,美國影星尤伯連納因肺癌逝世,臨終前忠告世人唔好食煙。短片香港版本由炳哥配音,尤伯連納碌大隻眼加上炳哥以沉厚聲線認真咁講「唔好食煙,千祈唔好食煙」,的確好有阻嚇性,而家睇返都驚驚地。炳哥話,因為呢個作品太深刻,接少好多廣告配音。

(來源:香港蘋果日報)

炳哥育有一子一女 數十年婚姻生活低調

一代配音王譚炳文今年6月發現肺癌,癌細胞急速擴散,昨晚凌晨12時許出現呼吸困難,家人急叫醫護車送往灣仔律敦治醫院,今早11時許離世,享年86歲。

炳哥的感情生活低調,與太太結婚數十年,育有一子一女,大女譚淑瑩是半個圈中人,有客串做特約演員,細仔早年到加拿大生活落地生根。據熟悉兩夫婦的人士表示,朋友間都稱呼他太太做「炳嫂」,她為人低調,性格賢淑,樂做炳哥背後的女人。由於細仔間中會返港探望兩老,炳嫂每次都會親自煮不少中式家庭菜給兒子品嚐,而炳哥常向身邊友人讚太太廚藝了得,煮得一手好菜。在女兒的社交網中,有分享炳哥兩公婆的生活點滴,不時出席親友飯局,亦會外出去寺廟一日遊食齋菜,盡顯老夫老妻恩愛。

近年,炳哥因身體毛病多,出入都由女兒陪同貼身照顧,而譚淑瑩去年終於有機會與父親合作,在《愛.回家之開心速遞》與老父同場。甚少透露家庭狀況的炳哥今年6月曾接受傳媒訪問時表示有四個孫,大孫做酒店經理、孫女做檢控官、還有一個做見習律師,一個仍在求學中。

(來源:東網)

《舊歡如夢》唱通街!譚炳文同李香琴緋聞傳足30年

譚炳文從50年代起便踏足娛樂圈,由播音及配音開始,繼而報道賽馬、拍電影、電視劇及出唱片,期間更擔任過導演,創造出圈中多個傳奇。

1959年,入行不久的炳哥加入了麗的呼聲,開始其播音事業生涯,起初,他只是擔任中午時段節目《言情小說》的主持,基於其出色的表現,及後得到賞識,繼而進軍配音界,為全港首部外國片集《You ask for it》配上粵語旁白,在69年更被無綫高薪挖角,期間為《包青天》、《希治閣》、《杏林春滿》等劇集配音,堪稱為「配音天王」。除此之外,炳哥更是香港首位賽馬評述員。

於5、60年代,炳哥開始向幕前進發,接拍多部電影及推出唱片,更試過一年灌錄過三十張唱片,曾唱的歌曲有大家熟悉的《舊歡如夢》、《禪院鐘聲》,多年來被不少歌星翻唱,《舊歡》的舞蹈更人人跟住跳,包括李克勤!炳哥演而優則導,擔任過多部十分賣座的粵語艷情片導演,不過於多年前接受傳媒訪問時,他的心仍繫於配音方面,更坦言想開設配音學校培育人才。炳哥轉戰電視圈亦十分成功,乃香港第一代電視人,在無綫拍攝不少劇集,其幽默搞笑細胞,令他成為《歡樂今宵》的台柱,趣劇《大鄉里》 的「炳門」,更是他的事業代表作。

炳哥大情大性兼口直心快,於90年代初由無綫過檔亞視的他,拍攝劇集時炮轟公司拍攝不準時,更有「火爆將軍」稱號,當時的工作人員指炳哥不會無理取鬧。炳哥嗜好不多,最喜歡就是賭錢,87年時股市狂瀉風暴中,有傳炳哥亦做了「大閘蟹」,不過當時炳哥自稱股災對他經濟影響不大,反叫股民冷靜。

最為人津津樂道的是與李香琴的緋聞,兩人從70年代開始合作至今,無論台上台下均被公認為是一對,因此緋聞傳足30多年。兩人緋聞亦一度令正印炳嫂難忍,炳嫂在粵語片時代一直為炳哥擔任助手,但當時有傳炳嫂因難忍炳哥與琴姐的緋聞,於是不再跟隨丈夫工作,留在家中專心照顧一對子女。

兩人不時雙雙去登台,又經常合作拍戲,到80年再在電視台聚首,一直秤不離砣。去到98年,兩人推出了《繽紛友情三十載》CD,同年並舉行《譚炳文•李香琴繽紛友情三十載》演唱會。2018年炳哥因心臟衰竭做搭橋手術,李香琴亦刻意避開傳媒往探病,顯得甚為避忌。

譚炳文入行以來雖然工作甚多,但甚少病痛,一直身體無恙,健康良好,直至2002年復活節,炳哥與李香琴拍檔在新加坡郵輪登台演出期間,半夜突然呼吸困難感到窒息,送往船上醫療室搶救後並無大礙,不過船上醫生指炳哥身體狀況欠佳,不准他繼續演出,其後炳哥在女兒陪同下回港作身體檢查。

而回港後炳哥被驗出心臟血管閉塞,要接受搭橋手術,及後再接受「內置心臟電擊去顫器」手術,令整個人消瘦了十多磅,需要休息多個月,並將下半年工作全部推掉,當時炳哥表示損失約80多萬。而同年8月,炳哥終於康復,重返無綫擔任配音工作。

留言

秘密留言

自我介紹

藍澤千影

Author:藍澤千影
.某行業老年無能雜工一名
.不知為何喜歡東方和可愛的動漫
請多來多留言~
如發現有影片連結已被移除,歡迎通知以便本人修補,謝謝^^
PS.請勿擅自抄襲本BLOG內容
PSA.請勿用真名稱呼本人XD...

狀態:σ`∀′) ゚∀゚)σ(?)

心情音樂:ポルノグラフィティ
小型聊天室
最新文章
類別
  K-ON (44)
最新留言
月曆
08 | 2020/09 | 10
- - 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 - - -
瞬間看地球(?)
FC2計數器(同一IP一天只計算1次)
來訪者統計(26/3/10開始)
free counters
搜尋欄
連結
部落格好友的申請

和此人成爲部落格好友

月份存檔
RSS連結